Divisional Secretariat - Arayampathy

அவுஸ்ரேலிய சைவ மன்றம் நன்கொடையாக வழங்கிய நிதியினைக் கொண்டு மண்முனைப்பற்று பிரதேச செயலகத்திற்கு உட்பட்ட புதுக்குடியிருப்பு கிராம உத்தியோகத்தர் பிரிவிலுள்ள 10 பயனாளிகளுக்கு குடிநீர் பெற்றுக்கொள்வதற்கான குழாய்கிணறுகளை நிர்மாணித்து சம்பிரதாயபூர்வமாக மக்களிடம் கையளிக்கும் நிகழ்வு 2023.09.06 ஆம் திகதி புதன்கிழமையன்று இடம்பெற்றது.

இந்நிகழ்விற்கு பிரதம அதிதியாக மண்முனைப்பற்று ஆரையம்பதி பிரதேச செயலாளர் திருமதி. ந.சத்தியானந்தி அவர்கள் கலந்து கொண்டு குழாய்க்கிணற்றினை திறந்து வைத்ததுடன் உரிய பயனாளியிடம் ஒப்படைத்தார். அத்துடன் இந்நிகழ்வில் சமூக நலன்புரி அமைப்பின் தலைவர் திருமதி. தயனி கிருஸ்ணாகரன், சமூக நலன்புரி அமைப்பின் உறுப்பினர்கள் மற்றும் பயனாளிகளும் கலந்து சிறப்பித்தனர். மேலும் சமூக நலன்புரி அமைப்பிற்கு அவுஸ்ரேலிய சைவ மன்றமானது வருடாந்தம் மனிதாபிமான பணிகளை முன்னெடுப்பதற்கு நிதியுதவிகளை வழங்கி வருகின்றமையும் குறிப்பிடத்தக்கது.

கலைக்கழகங்களின் செயற்பாடுகளை மேலும் விரிவுபடுத்தும் வகையில் மண்முனைப்பற்று பிரதேச செயலக கலாசார பேரவையின் ஆலோசனைக்கு அமைவாக ஒவ்வொரு கலைக்கழகமும் மாதம் ஒருமுறை ஒவ்வொரு நிகழ்வினை நடாத்துவதற்கு ஏற்பாடு செய்யப்பட்டுள்ளது. அதனடிப்படையில் கதிரவன் கலைக்கழகத்தினால் மண்முனைப்பற்று பிரதேச கலைஞர் ஒன்றுகூடல் நிகழ்வு மட்/தாழங்குடா றோமன் கத்தோலிக்க தமிழ் கலவன் பாடசாலையில் அமைந்துள்ள மீனாட்சி மரத்தடி முன்றலில் 10.09.2023 ஆம் திகதி ஞாயிற்றுக்கிழமை அன்று சிறப்பான முறையில் இடம்பெற்றது.

இந்நிகழ்விற்கு மண்முனைப்பற்று பிரதேச செயலாளர் திருமதி. ந. சத்தியானந்தி அவர்கள் சிறப்பு விருந்தினராக கலந்து கொண்டிருந்ததுடன் மாவட்ட கலாசார ஒருங்கிணைப்பாளர், கலாசார பிரிவு உத்தியோகத்தர்கள், கலாசார பேரவை உறுப்பினர்கள், கதிரவன் பட்டிமன்ற பேரவை உறுப்பினர்கள், கலைஞர்கள் எனப் பலர் கலந்து சிறப்பித்ததுடன் கலைஞர்கள் தங்களது அனுபவப் பகிர்வுடன் சிறப்பான முறையில் தங்களது ஆக்கபூர்வமான செயற்பாடுகளையும் வெளிப்படுத்தியிருந்தமை குறிப்பிடத்தக்கதாகும்.

வங்கி அல்லாத நிதி நிறுவனங்களின் மேற்பார்வைத் திணைக்களம், இலங்கை மத்திய வங்கி நடாத்தும் விழிப்புணர்வு நிகழ்வு, அங்கீகரிக்கப்படாத முறையில் வைப்புப் பெறலும் நிதித் தொழிலை நடாத்துதலும் எனும் தொனிப்பொருளில் 2023.08.24 ஆம் திகதி வியாழக்கிழமை மு.ப 9.00 - பி.ப 12.30 மணி வரை மண்முனைப்பற்று பிரதேச செயலாளர் திருமதி. ந.சத்தியானந்தி அவர்களின் தலைமையில் பிரதேச செயலக மாநாட்டு மண்டபத்தில் நடைபெற்றது.

குறித்த நிகழ்வில் திரு. க.பிரபாகரன், கிழக்கு பிராந்திய முகாமையாளர், இலங்கை மத்திய வங்கி, திருகோணமலை மற்றும் வளவாளராக திரு. சண்.குறிஞ்சிதரன், பிரதி பணிப்பாளர், வங்கி அல்லாத நிதி நிறுவனங்களின் மேற்பார்வைத் திணைக்களம், இலங்கை மத்திய வங்கி ஆகியோர் கலந்து கொண்டிருந்ததுடன் இந்நிகழ்வின் பங்குபற்றுனர்களாக மண்முனைப்பற்று பிரதேச செயலக கிராம உத்தியோகத்தர்கள், சமுர்த்தி அபிவிருத்தி உத்தியோகத்தர்கள், பொருளாதார அபிவிருத்தி உத்தியோகத்தர்கள் மற்றும் ஏனைய வெளிக்கள உத்தியோகத்தர்களும் கலந்து கொண்டிருந்தமை குறிப்பிடத்தக்கது.