Divisional Secretariat - Arayampathy

2024.01.19 00

உழவர் திருநாளாம் தைத்திருநாளை சிறப்பிக்கும் வகையில் மண்முனைப்பற்று பிரதேச செயலகத்தினால் ஏற்பாடு செய்யப்பட்ட பொங்கல் விழா நிகழ்வானது 2024.01.19 ஆம் திகதி வெள்ளிக்கிழமையன்று மண்முனைப்பற்று பிரதேச செயலாளர் திருமதி தெட்சணகௌரி தினேஷ் அவர்களின் தலைமையில் மாவிலங்கதுறை கிராம உத்தியோகத்தர் பிரிவில் அமைந்துள்ள மண்முனை ஸ்ரீ பத்திரகாளியம்மன் ஆலய வளாகத்தில் வயல் அறுவடை பாரம்பரிய நிகழ்வுகளுடன் சிறப்பாக இடம்பெற்றது.

இந்நிகழ்வில் பிரதேச செயலக உத்தியோகத்தர்களின் கிளை ரீதியான பல வகையான பொங்கல் பானைகள் நிகழ்வை அலங்கரித்தன.ஆன்மீக அதிதியாக கலந்து சிறப்பித்த மாவிலங்கதுறை கிராம உத்தியோகத்தர் பிரிவிலுள்ள மண்முனை ஸ்ரீ பத்திரகாளியம்மன் ஆலய பிரதம குரு திரு. மகேந்திரராசா ரஜீவன் அவர்களின் ஆன்மீக உரையுடன் நிகழ்வுகள் சம்பிரதாயபூர்வமாக ஆரம்பித்து வைக்கப்பட்டன.இந்நிகழ்வில் உதவிப் பிரதேச செயலாளர் திருமதி. லோகினி விவேகானந்தராஜ், பிரதி திட்டமிடல் பணிப்பாளர் திருமதி மனோரஞ்சனி ஜெயச்சந்திரன், கணக்காளர் திரு வல்லிபுரம் நாகேஸ்வரன், நிருவாக உத்தியோகத்தர் திரு சின்னத்துரை திவாகரன் ஆகியோர் கலந்து சிறப்பித்தனர். தொடர்ந்து மாவிலங்கதுறை ஸ்ரீ சித்தி விநாயகர் அறநெறிப் பாடசாலை, ஸ்ரீ பத்திரகாளியம்மன் அறநெறிப் பாடசாலை மாணவர்களின் நடன நிகழ்வுகள், உடுக்கு இசை, பிரதேச செயலக உத்தியோகத்தர்களின் உழவர் பாடல், கிராமிய பாடல் என பல கலை நிகழ்வுகள் இடம் பெற்றது.

இந்நிகழ்வினை மண்முனைப்பற்று பிரதேச செயலகத்துடன் இணைந்து மாவிலங்கதுறை கிராம உத்தியோகத்தர் பிரிவிலுள்ள மண்முனை பகுதி ஸ்ரீ பத்திரகாளியம்மன் ஆலயம், கிராம அபிவிருத்திச் சங்கம், மாதர் கிராம அபிவிருத்திச் சங்கம், விளையாட்டுக் கழகம், முதியோர் சங்கம், மீனவர் சங்கம், ஹெயார் நுன்நிதிச் சங்கம் என பல அமைப்புக்கள் இணைந்து ஒழுங்குபடுத்தியமை குறிப்பிடத்தக்கது.

2024.01.19 Picture1 1280x856

2024.01.19 Picture2 1162x960

2024.01.19 Picture3 1155x960

2024.01.19 Picture4 1280x892

2024.01.08 ஆம் திகதி திங்கட்கிழமையன்று மண்முனைப்பற்று பிரதேச செயலகப் பிரிவின் ஒன்பதாவது பிரதேச செயலாளராக தனது கடமையினைப் பொறுப்பேற்றிருக்கும் திருமதி. தெட்சணகௌரி தினேஷ் அவர்களை உத்தியோகபூர்வமாக வரவேற்கும் நிகழ்வு பிரதேச செயலக மாநாட்டு மண்டபத்தில் இடம்பெற்றது.

இந்நிகழ்வில் முன்னைநாள் பிரதேச செயலாளர் திருமதி. ந.சத்தியானந்தி அவர்கள் கலந்து சிறப்பித்திருந்ததுடன் மண்முனைப்பற்று பிரதேச செயலக உதவி பிரதேச செயலாளர் திருமதி. L.விவேகானந்தராஜ், பிரதி திட்டமிடல் பணிப்பாளர் திருமதி. M.ஜெயசந்திரன், கணக்காளர் திரு. V.நாகேஸ்வரன், நிர்வாக உத்தியோகத்தர் திரு. S.திவாகரன் மற்றும் பிரதேச செயலக உத்தியோகத்தர்கள் கலந்து கொண்டிருந்தமை குறிப்பிடத்தக்கது.

"வலுவான எதிர்காலத்திற்கான தொடக்கவுரை" என்ற தொனிப்பொருளின் கீழ் 2024 ஆம் ஆண்டின் கடமைச் செயற்பாடுகளை ஆரம்பிக்கும் நிகழ்வானது மண்முனைப்பற்று பிரதேச செயலக வளாகம் மற்றும் மண்முனைப்பற்று பிரதேச செயலக மாநாட்டு மண்டபத்தில் வருடத்தின் முதன் நாளான 2024.01.01 ஆம் திகதி திங்கட்கிழமை இன்று மு.ப 8.40 மணிக்கு அனைத்து உத்தியோகத்தர்களின் பங்கேற்புடன் ஆரம்பமானது.

மேற்படி நிகழ்வில் தேசிய கொடி ஏற்றல் மற்றும் தேசிய கீதம் இசைக்கப்பட்டதுடன் அனைத்து அரச உத்தியோகத்தர்களும் அரச சேவை சத்தியப்பிரமாணத்தை மேற்கொண்டனர். மேலும் ஒரு நிமிட மௌன இறை வணக்கம் மேற்கொள்ளப்பட்டு பின்னர் பிரதேச செயலாளர் திருமதி. ந.சத்தியானந்தி அவர்களினால் தலைமையுரை நிகழ்த்தப்பட்டது. அத்துடன் உத்தியோகத்தர்கள் அனைவருக்கும் சிற்றுண்டிகள் வழங்கப்பட்டு இந்நிகழ்வானது இனிதே நிறைவுற்றது.
 

மண்முனைப்பற்று பிரதேச செயலகத்தின் எட்டாவது பிரதேச செயலாளராக எட்டு ஆண்டுகள் (2016 - 2024) எமது பிரதேசமானது நிலைபேறான அபிவிருத்தியை அடையும் நோக்கில் தன்னாலான அர்ப்பணிப்பு மிக்க பக்கச்சார்பற்ற சேவை வழங்கி பிரதேசத்தின் கலை, கலாசாரம், விளையாட்டு என பல்துறைகளிலும் அனைத்து சேவைகளும் பிரதேச மக்களை சென்றடையும் வகையில் கண்ணியமான, நேர்த்தியான சேவையாற்றிய பிரதேச செயலாளர் திருமதி. ந.சத்தியானந்தி அவர்களின் பிரியாவிடை நிகழ்வு 2024.01.05 ஆம் திகதி வெள்ளிக்கிழமையன்று பிரதேச செயலக மாநாட்டு மண்டபத்தில் மண்முனைப்பற்று பிரதேச செயலக நலன்புரிச்சங்கத்தின் ஏற்பாட்டில் இடம்பெற்றது. இந்நிகழ்வின் போது நலன்புரிச் சங்க உறுப்பினர்களால் எமது பிரதேச செயலாளர் அவர்கள் பொன்னாடை போர்த்தி, மலர்மாலைகள் மற்றும் மலர்செண்டுகள், நினைவுச்சின்னம் வழங்கப்பட்டு பாராட்டி கௌரவிக்கப்பட்டபோது நலன்புரிச்சங்கத்தினால் தனக்கென வழங்கப்பட்ட அன்பளிப்பு கொடுப்பனவினை வறுமைக்கோட்டின் கீழ் வாழும் பிரதேச கலைஞர்களுக்காக நன்கொடையாக வழங்கியிருந்தமை குறிப்பிடத்தக்கது.

மண்முனைப்பற்று பிரதேச செயலகப் பிரிவிற்கு அளப்பெரிய சேவையினை வழங்கிய மதிப்பிற்கும் அன்பிற்குமுரிய எமது பிரதேச செயலாளர் அவர்கள் அரச சேவையில் ஏறத்தாழ 30 வருடங்களும் இலங்கை நிர்வாக சேவையில் 20 வருடங்களும் அர்ப்பணிப்புடன் தனது சேவையினை ஆற்றியவராவார்.

இவரது சேவைக் காலத்தில் இலங்கை நிர்வாக சேவையில் உதவி செயலாளர், மாகாண பொதுச்சேவை ஆணைக்குழு - கிழக்கு மாகாணம், உள்ளுராட்சி உதவி ஆணையாளர், பிராந்திய உள்ளுராட்சி ஆணையாளர் அலுவலகம் - மட்டக்களப்பு, மேலதிக மாகாண கல்வி பணிப்பாளர் (நிர்வாகம்), மாகாண கல்வி திணைக்களம் - கிழக்கு மாகாணம், உதவி செயலாளர், கல்வி அமைச்சு - கிழக்கு மாகாணம், மாகாண பிரதி சுகாதார பணிப்பாளர் (நிர்வாகம்), சுகாதார திணைக்களம் - கிழக்கு மாகாணம், பிரதேச செயலாளர், பிரதேச செயலகம் - மண்முனை தென்மேற்கு மற்றும் பிரதேச செயலாளர், பிரதேச செயலகம் - மண்முனைப்பற்று ஆகிய திணைக்களங்களில் உயர் பதவிகளில் தனது சேவையினையாற்றிய இவர் தற்போது மண்முனைமேற்கு, வவுணதீவு பிரதேச செயலகத்திற்கு இடமாற்றம் பெற்றுச் செல்வது பெருமைமிக்க விடயமாகும். இருப்பினும் சிறந்த ஆளுமை மற்றும் தலைமைத்துவம் கொண்ட எமது பிரதேச செயலாளர் அவர்கள் இடமாற்றம் பெற்றுச் செல்வது மண்முனைப்பற்று பிரதேசத்திற்கும் பிரதேச செயலகத்திற்கும் பாரிய இழப்பாகும் என்பது அனைவராலும் மறுக்க முடியாத உண்மையே..!!!

2004 ஆம் ஆண்டு சுனாமி இடம்பெற்று 19 வருடங்கள் நிறைவு தினத்தினை முன்னிட்டு தேசிய பாதுகாப்பு தின நிகழ்வானது பிரதேச செயலாளர் திருமதி சத்தியானந்தி நமசிவாயம் அவர்களின் தலைமையில் உதவி பிரதேச செயலாளர், பிரதி திட்டமிடல் பணிப்பாளர், நிருவாக உத்தியோகத்தர், அனர்த்த முகாமைத்துவ உத்தியோகத்தர்கள் மற்றும் பிரதேச செயலக உத்தியோகத்தர்கள் ஆகியோரின் பங்குபற்றுதலுடன் பிரதேச செயலக வளாகத்தில் 2023.12.26 ஆம் திகதி செவ்வாய்கிழமை அன்று மு.ப 9.20 மணிக்கு இடம்பெற்றது. இந் நிகழ்வில் தேசியக்கொடி ஏற்றப்பட்டு தேசிய கீதம் இசைக்கப்பட்டதுடன் சுனாமி அனர்த்தத்தின் போது உயிர்நீத்தவர்களுக்கு இரு நிமிட மௌன அஞ்சலியைப் தொடர்ந்து பிரதேச செயலாளர் அவர்களால் நிகழ்வு தொடர்பான உரை இடம்பெற்று நன்றியுரையுடன் நிகழ்வு நிறைவு பெற்றது. அத்துடன் மண்முனைப்பற்று பிரதேச செயலக பிரிவிற்குட்பட்ட அனைத்து கிராம உத்தியோகத்தர் பிரிவுகளிலுமுள்ள மத தலங்களிலும் பிரார்த்தனையும் விழிப்புணர்வு நிகழ்வும் இடம்பெற்றது.

2023.12.26 Pic