ஜனாதிபதி செயலகத்தின் பணிப்புரைக்கு அமைவாக ஒழுங்கு செய்யப்பட்ட "அத்தம, " வேலைத்திட்டத்தின் கீழ் கடற்கரை தூய்மைப்படுத்தல் நிகழ்வானது 19.09.2026 அன்று பிரதேச செயலாளர் திருமதி தெட்சணகௌரி தினேஷ் அம்மணி அவர்களின் தலைமையில் புதுக்குடியிருப்பு, புதுக்குடியிருப்பு தெற்கு ஆகிய கிராம உத்தியோகத்தர் பிரிவுகளை உள்ளடக்கியதாக இடம் பெற்றது.

இந்நிகழ்வில் பிரதேச செயலாளர், உதவி பிரதேச செயலாளர், பிரதி திட்டமிடல் பணிப்பாளர், நிர்வாக உத்தியோகத்தர்,கிராம உத்தியோகத்தர்களுக்கான நிர்வாக உத்தியோகத்தர்,சமுர்த்தி முகாமையாளர், பாதுகாப்பு படை உத்தியோகத்தர்,சுகாதார வைத்திய அதிகாரி,பிரதேச செயலக உத்தியோகத்தர்கள்,பிரதேச சபை துப்பரவு பணியாளர்கள், பிரஜா சக்தி உறுப்பினர்கள், பொதுமக்கள், சங்க உறுப்பினர்கள் என பலரும் கலந்து கொண்டனர்.

இவ் வேலைத்திட்டமானது மண்முனைப்பற்று பிரதேச செயலகத்தின் 27 கிராம சேவகர் பிரிவுகளிலும் சமூக வலுவூட்டல் உத்தியோகத்தர்களின் தலைமையில் நடைபெற்றது. அத்துடன் மண்முனைப்பற்று பிரதேச செயலகப் பிரிவுக்கான விசேட வேலைத்திட்டமாக புதுக்குடியிருப்பு கடற்கரை துப்பரவு செய்யப்பட்டமை குறிப்பிடத்தக்கது.

 

மண்முனைப்பற்று பிரதேச செயலகத்தின் இவ் வருடத்திற்கான மூன்றாவது பிரதேச ஒருங்கிணைப்புக் குழு கூட்டமானது பிரதேச செயலாளர் திருமதி தெட்சணகௌரி தினேஷ் அம்மணி அவர்களின் ஒழுங்குபடுத்தலில் 02.09.2026 பிற்பகல் 2.00 மணிக்கு பிரதேச செயலக மாநாட்டு மண்டபத்தில் பிரதேச ஒருங்கிணைப்புக் குழுத் தலைவர் கெளரவ கந்தசாமி பிரபு அவர்களின் தலைமையில் நடைபெற்றது.

இதில் கௌரவ பாராளுமன்ற உறுப்பினர்களான

ஞானமுத்து ஸ்ரீநேசன், வைத்தியர் இளையதம்பி சிறிநாத், கலாநிதி எம்.எல்.எ.எம் ஹிஸ்புள்ளா மற்றும் இரா சாணக்கியன் ஆகியோருடன் மண்முனைப்பற்று பிரதேச சபையின் பிரதி கௌரவ தவிசாளர், கௌரவ பிரதேச சபை உறுப்பினர்கள் பிரதேச செயலக உதவி பிரதேச செயலாளர் மற்றும் அரச திணைக்களங்களின் திணைக்கள தலைவர்கள், பிரதிநிதிகள் உட்பட பிரதேச செயலக உத்தியோகத்தர்களும் கலந்துகொண்டனர்.

குறித்த கலந்துரையாடலில் கடந்த கூட்டத்தில் நிறைவேற்றப்பட்ட தீர்மானங்களுக்கு திணைக்களங்கள் சார்பாக எடுக்கப்பட்ட நடவடிக்கைகள் தொடர்பாகவும், 2026ம் ஆண்டில் நடைபெற்றுக் கொண்டிருக்கும் அபிவிருத்தி திட்டங்கள் மற்றும் 2026ம் ஆண்டுக்காக முன்னெடுக்கப்படவுள்ள திட்டங்கள் தொடர்பாக விரிவாக கலந்துரையாடப்பட்டதுடன் திணைக்களங்களினால் முன்னெடுக்கப்படும் திட்டங்கள் மற்றும் பிரச்சினைகள் தொடர்பாகவும் கலந்துரையாடப்பட்டது.

மேலும் பிரதேசத்தில் காணப்படும் வைத்தியசாலை கள் மற்றும் கல்வியியல் கல்லூரியில் காணப்படுகின்ற குறைபாடுகள் தேவைகள் தொடர்பாக விரிவாக கலந்துரையாடப்பட்டதுடன் இக்கூட்டமானது இனிதே நிறைவு பெற்றது.

 

2025/2026 ஆண்டுக்கான விவசாய நடவடிக்கைகள் தொடர்பான பொருளாதாரத் தொகை மதிப்பீட்டுக்கான மண்முனைப்பற்று பிரதேச செயலக கணக்கெடுப்பு உத்தியோகத்தர்களுக்கான பயிற்சி நெறியானது மண்முனைப்பற்று பிரதேச செயலக மாநாட்டு மண்டபத்தில் 17.09.2026ஆம் திகதி காலை 9.30மணிக்கு இடம்பெற்றது.

இதன் போது மட்டக்களப்பு மாவட்டத்தில் இச்செயற்பாட்டை முறையாக முன்னெடுப்பதற்கான ஆரம்பக்கட்ட கலந்துரையாடல் மற்றும் தொழில்நுட்பப் பயிற்சிகள் வழங்கப்பட்டதுடன் பயிர்ச்செய்கை, கால்நடை மற்றும் நீர்வாழ் உயிரினங்கள் தொடர்பான புள்ளிவிபரங்களைத் திரட்டுவதற்கான TAB பயன்பாடு மற்றும் தரவு சேகரிப்பு முறைகள் குறித்தும் உத்தியோகத்தர்களுக்கு பயிற்சி அளிக்கப்பட்டது.

இந்நிகழ்விற்கு வளவாளர்களாக மாவட்ட செயலக புள்ளி விபரவியல் உத்தியோகத்தரான ஜனாப்.M.I.M.அசீஸ் , புள்ளி விபரவியல் அபிவிருத்தி உத்தியோகத்தரான திரு.பி.பிரசன்னா மற்றும் மண்முனைப்பற்று பிரதேச செயலக புள்ளி விபரவியல் உத்தியோகத்தர் திரு.K.தேவேந்திரன் ஆகியோர் கலந்துகொண்டனர்.

மேலும் பயிற்சிநெறியைப்பெற்றுக்கொள்ளும் உத்தியோகத்தர்களாக கிராம உத்தியோகத்தர்கள் மற்றும் சமூக வலுவூட்டல் அபிவிருத்தி உத்தியோகத்தர்கள் ஆகியோர் கலந்து கொண்டனர்.

 

 

 

 

மண்முனைப்பற்று பிரதேச செயலகத்தின் மூன்றாம் காலாண்டுக்கான கணக்காய்வு மற்றும் முகாமைத்துவக் குழுக் கூட்டம்

 

02.09.2026 ஆம் திகதியன்று முற்பகல் 9.30 மணிக்கு பிரதேச செயலக மாநாட்டு மண்டபத்தில் மூன்றாம் காலாண்டுக்கான கணக்காய்வு மற்றும் முகாமைத்துவக் குழுக் கூட்டமானது பிரதேச செயலாளர் திருமதி. தெட்சணகௌரி தினேஷ் அம்மணி அவர்களின் தலைமையில் இடம்பெற்றது.

பிரதேச செயலக உள்ளகக் கணக்காய்வு பிரிவு உத்தியோகத்தர்களின் ஒழுங்கமைப்பில் இடம்பெற்ற இக்கூட்டத்திற்கு அவதானிப்பாளராக மட்டக்களப்பு தேசிய கணக்காய்வு அலுவலகத்தின் கணக்காய்வு அத்தியட்சகர் திரு. ரொபட் அலோசியஸ் அவர்கள் கலந்து கொண்டதுடன் மாவட்ட செயலக பிரதம உள்ளகக் கணக்காய்வாளர் திரு A .S சசிகரன், உதவிப் பிரதேச செயலாளர் திரு K.இளங்குமுதன், கணக்காளர் திரு A. மோகனகுமார், நிர்வாக உத்தியோகத்தர் திரு S. திவாகரன் , கிராம அலுவலகர்களுக்கான நிர்வாக உத்தியோகத்தர் திரு. J. A. சுரேஸ், சமுர்த்தி தலைமையக முகாமையாளர், சமுர்த்தி வங்கி முகாமையாளர்கள்,பதவி நிலை உதவியாளர்கள், சமூக வலுவூட்டல் உத்தியோகத்தர்கள், சமுர்த்தி அபிவிருத்தி உத்தியோகத்தர்கள், மற்றும் வெளிக்கள உத்தியோகத்தர்களும் கலந்து கொண்டிருந்தனர்.

இக்கூட்டத்தில் நிதி ,நிருவாகம், திட்டமிடல், காணி , சமூக சேவை, சிறுவர் மற்றும் மகளிர், கிராம அபிவிருத்தி, கலாசாரம், விதாதா ஆகிய பிரிவுகள் மற்றும் சமுர்த்தி வங்கிகள்,மகாசங்கம் என்பன தொடர்பான மீளாய்வுகளும் 2026இன் தற்போது வரையான முன்னேற்றங்களும் பிரிவிற்குப் பொறுப்பான உத்தியோகத்தர்களினால் முன்னளிக்கை மூலம் தெளிவுபடுத்தப்பட்டது.

பின்னர் கணக்காய்வு. அத்தியட்சகர், பிரதம உள்ளகக் கணக்காய்வாளர் ஆகியோர்களால் ஆலோசனைகளும் கருத்துரைகளும் வழங்கப்பட்டு கூட்டமானது கணக்காளரின் நன்றியுரையுடன் பிற்பகல் 12.45 மணியளவில் இனிதே நிறைவு பெற்றது.